Abafashije kugira amasezerano ya Arusha aboneke basabwa gufasha mu kibazo c’Uburundi

Yanditswe na MUGISHA Van Naris
Kuya 16 décembre 2017 saa 10:36
25275
0 0

Urunani ruhurikiyemwo imigambwe n’abanyaporitike bavuga ko bishinze gukingira amasezerano ya Arusha CNARED, rusaba amashirahamwe yari ahari igihe hashirwa umukono ku masezerano ya Arusha ko ahururira hamwe mu maguru masha, kugira bafashe gutanga inyishu iganiriweko ku bibazo biri mu Burundi.

Nkuko biri mw’itangazo ry’urunani CNARED ryateweko umukono n’umukuru warwo Dr Jean MINANI kur’uyu wa gatanu igenekerezo rya 15 Kigarama 2017, ayo mashitahamwe ni iry’akarere ka Afrika y’Ubuseruko,Ishirahamwe ry’Ubumwe bwa Afrika, Ishirahamwe Mpuzamakungu ONU, Ishirahamwe ry’Ubumwe bwa Buraya, Fondation Nelson Rolihlahla Mandela na Fondation Mwalimu NYERERE.

Muri iro tangazo, urunani CNARED rumenyesha ko amatora yo kwemeza canke guhakana ibwirizwa nshingiro rutayashigikiye kuko bizotuma amsezerano ya Arusha azimangana kandi ariyo yatumye haboneka inyishu ziganiriweko na bose ku ndyane zari mu Burundi, ivyo kandi bigashobora gutuma haduka intambara zishobora no gutandukira akarere.

Urunani CNARED rusohoye iryo tangazo, mu gihe kuwa kabiri igenekerezo rya 12 Kigarama 2017, umukuru w’igihugu yatanguje muri komine Bugendana, intara ya Gitega, isekeza ryo gusigurira abarundi ibizohinyanyurwa mw’ibwirizwa nshingiro rishasha ry’Uburundi.

Mw’ijambo ryiwe,umukuru w’igihugu Petero NKURUNZIZA yaragabishije uwo wese yobangamira umugambi wo guhinyanyura ibwirizwa nshingiro, haba mu mvugo canke mu ngiro.

Umukuru w’murwi utegura amatora CENI Pierre Claver NDAYICARIYE yavuze kur’uyuwa gatanu ko amatora yo kwemeza canke guhakana ibwirizwa nshingiro rishasha ashobora kuba mu kwezi kwa gatanu kw’umwaka uza wa 2018.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha