Ligue des Champions : Real Madrid yatahukanye igikombe ku ncuro ya gatatu yikurikiranya

Kuva ku munota wa mbere w’urukino, imirwi yose yarerekanye ko ikeneye gutahukana igikombe, bituma bakinisha inguvu n’ubukerebutsi bwinshi, ku buryo ku munota wa 30 gusa umukinyi Mouhamed Salh yavuye mu rukino anyuma yo gukomereka.

Naho igice ca mbere c’urukino caheze imirwi yose inganya ubusa ku bundi, ku munota wa 51, kw’ikosa ridakunze kuboneka mu rukino rw’umupira w’amaguru, umunyezamu wa Liverpool yatereye umupira n’ukuboko agomba kuwuha abakinyi b’inyuma, aca asanga yawushize ku kuguru kwa Karim Benzema, gutyo igitsindo ca mbere ca Real Madrid kiraboneka.

Ku munota wa 55, umukinyi w’umuyasenegal Sadio Mane, akinirav umurwi Liverpool, yinjije igitsindo ca Liverpool, gutyo banganya igitsindo kimwe ku kindi, ariko ku munota wa 63, inyuma y’umwanya muto yinjiye mu kibuga, Galet Bale yinjije igitsindo ciza cane, gishobora no kuba mu vyaranze ihiganwa.

Urukino rwabandanije kutorohera umurwi wa Liverpool, mbere ku munota wa 83, Galet Bale yinjiza igitsindo ca gatatu, urukino ruca rurangira ari ibitsindo bitatu vya Real Madrid ku gitsindo kimwe ca Liverpool.

Umurwi Real Madrid utwaye igikombe c’ihiganwa rihuza imirwi yabaye iya mbere mu bihugu vyayo ku mugabane wa Buraya, ku ncuro ya gatatu wikurikiranya.