Mahama : Abarundi b’impunzi bagirizwa kudandaza urumogi bashikirijwe Sentare

Yanditswe na Egide NDUWIMANA
Kuya 2 Myandagaro 2017 saa 11:52
Yasomwe : 18792
0 0

Igiporisi c’Urwanda kimenyesha ko cashikirije Sentare y’ico gihugu impunzi y’Umurundi yo mw’ikambi ya Mahama, mu karere ka Kirehe, yafatanwe urumogi mu mukwabu wakozwe ku munsi wa gatandatu w’indwi iheze.

Umuvugizi w’igiporisi mu ntara z’ubuseruko bw’Urwanda, IP Dusabe Bosco, yabwiye ikinyamakuru IGIHE ko muri uwo mukwabu bafashe Abarundi batandatu, ariko batanu muribo bakaba bamaze kurekurwa. Hasigaye umwe upfungiye ku mu giporisi i Kirehe.

Yagize ati : “Ni umukwabu wakozwe ku wa Gatandatu kuko hari amakuru twari dufite ko hari ibiyobyabwenge bicururizwa mu nkambi, hari batandatu twafashe ariko kugeza ubu uwafunzwe ni umwe twafatanye urumogi ni nawe twashyikirije parike.”

Yabandanije avuga ko muri iyo kambi ya Mahama basanzemwo inzoga zitemewe n’amategeko, hamwe n’urumogi rwafatanwe uwo yashikirijwe ubutungane.

IP Dusabe yasavye impunzi z’Abarundi kwigenza neza, kuko uwuzokorera icaha wese ku butaka bw’Urwanda azohanwa, kandi ko ubutungane butazoraba ko ari impunzi.

Yagize ati : “Impunzi zigomba kubahiriza amategeko y’igihugu zahungiyemo, ntabwo zifite ubudahangarwa kuko zitwa impunzi. Birinde ibyaha kuko itegeko rihana uwo ariwe wese, ntabwo rireba ngo uri impunzi cyangwa umwenegihugu.”

Mu giporisi c’Urwanda bavuga muri uwo mukwabu hari hafashwe abarundi batandatu, mu gihe hari amakuru yavuga ko abatawe muri yompi barenga 20. IP Dusabe Bosco, umuvugizi w’igiporisi mu ntara z’ubuseruko bw’Urwanda, yabihakanye, yemeza ko ari batandatu gusa bafashwe.

Amakuru dukura mw’ikambi y’i Mahama avuga ko mu mukwabu wakozwe, abafashwe ari abagirizwa ko bakorana n’iperereza hamwe n’igisoda vy’Uburundi. Imiryango y’abo bafashwe ikamenyesha ko gushika ubu itazi aho bapfungiwe.

Uwo murundi umwe yagirizwa ko yafatanwe urumogi niyagirwa n’icaha, bitegekanijwe ko ashobora guhanishwa umunyororo wo kuva ku myaka itatu gushika ku myaka itanu, hamwe n’amande y’amafaranga ava ku bihumbi amajana atanu vy’amanyarwanda, gushika ku miriyoni zitanu, nk’uko biri mu ngingo y’594 mu gitabu mpanavyaha c’Urwanda.


Kumenyekanisha

1
Toyi desire 2-08-2017 à 16:48

ahubwonukuzamuraha inkozizibibi kukonibobaduteye akaga.

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha