Zimbabwe: ONU isaba reta y’ico gihugu kugarukana ituze mu gihugu

Amakuru dukesha BBC amenyeshako ishirahmwe mpuzamakungu ONU rifise impungenge hamwe n’ubwoba bivuye ku bikorwa vy’imyiyerekano vyatumye abantu 3 murico gihugu bapfa mu gihe abasirikare b’igihugu barasa abariko biyerekana.

Ayo makuru avuga ko ivyavuye mu matora y’abashingamateka muri Zimbabwe vyerekana ko umugambwe uri k’ubutegetsi wa Zanu-PF ariwo watsindiye intebe nyinshi ariko abatavugarumwe na Reta bavuga ko umugambwe Zany-PF wivye amajwi.
Urunani rw’imigambwe itavugarumwe na Reta ya Zimbabwe ruzwi nka MDC ruvuga ko uwaruserukiye mu matora Nelson Chamisa yatsinze umukuru w’igihugu ariho ubu Emmerson Mnangagwa naho ivyavuye mu matora y’umukuru w’igihugu bitaramenyeshwa.

Umunyamabanga mukuru w’ishirahamwe Mpuzamakungu ONU,Antonio Guterres yasavye abanyaporitike bose bo muri Zimbabwe gutekana.

Bimwe mu bihugu vya rutura vyamenyesheje ko mu gihugu hakwiye kuba ituze kuko Zimbabwe kigifise umwanya n’akaryo kugira ejo hazobe heza kurusha.

Amatora yatunganijwe mu gihugu ca Zimbabwe ku musi wa mbere w’iyi ndwi abaye amatora ya mbere ategekanijwe kuva uwahoze ari umukuru w’igihugu Robert Mugabe akuwe ku butegetsi mu mwaka uheze wa 2017.