Ababuranira urwaruka rwa MSD basaba ko urubanza rwokwunguruzwa

Ababuranira urwaruka rw’umugambwe MSD rupfungiwe mw’ibohero rikuru rya Mpimba basaba ko urwo rubanza rwohabwa irindi sango, kandi ntirusubire kuburanishirizwa mw’ibohero rikuru rya Mpimba, bagasaba ko n’umukuru w’intahe yotaramurwa kuko amaze kwerekana ko atigenga.

Mu kiganiro yahaye abamenyeshamakuru kuri uwu wa kabiri, umushingwamanza Armel Niyongere, umwe mu baburanira urwaruka rw’umugambwe MSD rupfungiwe mw’ibohero rikuru rya Mpimba, amenyesha ko urwo rubanza ruriko rurajuragizwa, akabona ko rwahawe intumbero ya poritike. Umushingwamanza Armel Niyongere atangazwa n’ukubona gushika n’ubu batarahabwa dosiye y’urwo rubanza kugira barutegure, kandi badahengeshanya kuyisaba. Uwo mushingwamanza asaba ko urwo rubanza rwokwunguruzwa, kuko rudashobora kuburanishwa kuri uwu wa mbere igenekerezo rya 29 Kigarama 2014, nk’uko bitegekanijwe, kandi batarahabwa iyo dosiye kugira bayige. Mw’ikete rya kabiri barungiye umukuru wa sentare isubiramwo imanza ikukira igisagara ca Bujumbura kuri uwu wa 18 Kigarama 2014, umushingwamanza Armel NIYONGERE ari kumwe n’abandi bashingwamanza bafasha urwo rwaruka rwa MSD kuburana basavye ko bohabwa iyo dosiye.

Mu gihe incuro zibiri zose urwo rubanza rwaburanishirijwe mw’ibohero rikuru rya Mpimba, umushingwamanza Armel Niyongere asaba ko rwoshirwa muma sentare asanzwe abigenewe, ababishaka bose bakaza kwumviriza bitagoranye, kuko ari intahe y’icese.

Nk’uko umushingwamanza Armel Niyongere abandanya abishikiriza, umukuru w’intahe, Athanase Niyondagije yotaramuka kuko amaze kwerekana ko atigenga.