Abaserukira abatwa biyamiriza ababiyitirira mu mirwi itegura amatora

Ishirahamwe UNIPROBA riharanira iterambere ry’abatwa ririyamiriza abantu bashizwe mu mirwi itegura amatora mu ntara (CEPI) biyitirira abatwa. Muri UNIPROBA bavuga ko abo bantu baserukiye ubundi bwoko atari ubw’abatwa.

Umuvugizi w’umurwi w’igihugu ujejwe gutegura amatora (CENI) yari yamenyesheje ko mu bashizwe mu mirwi y’intara ijejwe gutegura amatora CEPI (Commission Electorale Nationale Indépendante) bashizemwo abatwa babiri baserukira abandi. Mw’ishirahamwe UNIPROBA bavuga ko bakiranye umunezero ivyo vyavuzwe, kuko bavuga ko yari intango yo kwemera ko abo mu bwoko bw’abatwa bohabwa uburenganzira nk’ubw’abandi barundi bose bo mu yandi moko.

Umukenguzamateka Vital Bambanze, kw’izina ry’amashirahamwe aharanira iterambere ry’abatwa amenyesha ko baguye mu gahundwe basanze abo mu murwi CENI bavuga ko baserukiye abatwa ari abo mu yandi moko, abo nabo akaba ari Léonard NIZIGIYIMANA umututsi yashizwe muri CEPI Ngozi, hamwe na Arthémon MUNTUNUTWE umuhutu yashizwe muri CEPI Kayanza.

Umukenguzamateka Vital Bambanze