Gitega : Ubushikiranganji bwo kumenyesha amakuru bwatunganije inama y’iminsi ibiri

Mu ntara ya Gitega hakoraniye inama yateguwe n’ubushikiranganji bw’ukumenyesha amakuru, yatanguye kuri uwu wa kane, ihuza abarongoye itangazamakuru mu Burundi. Muri iyo nama bariko barabira hamwe ingene ivyasabwe mu nama rukokoma y’itangazamakuru vyoshirwa mu ngiro.

Ubushikiranganji bw’ukumenyeshamakuru bwatunganije iyo nama inyuma y’iyindi yaheruka kubera i Gitega. Intumbero yayo akaba ari ugushira ahabona umugambi w’igihugu w’ukumenyesha amakuru (politique nationale de la communication) hamwe n’ukubandanya kwitegurira ukwinjira mu buhinga bwa none (politique nationale de l’audiovisuel).

Tharcisse Nkezabahizi, umushikiranganji ajejwe ugutumatumanako amakuru, ari nawe yuguruye ibikorwa vy’iyo nama yamenyesheje ko umugambi w’igihugu w’ukumenyesha amakuru uje hageze kuko uhuriranye n’iyinjira mu buhinga bwa none (passage de l’analogie au numerique).

Mu ntumbero y’ukurondera ingene iyo migambi ibiri (umugambi w’igihugu w’ukumenyesha amakuru : politique nationale de la communication, hamwe n’ukubandanya kwitegurira ukwinjira mu buhinga bwa none : politique nationale de l’audiovisuel) yoshirwa mu ngiro, abari muri iyo nama izomara iminsi ibiri basavye ubushikiranganji bw’ugutumatumanako amakuru ko itegeko rigenga umwuga wo kumenyasha amakuru ryotosorwa, ingingo zitubahiriza ibwirizwa shingiro zikurwemwo, nk’uko vyasabwe mu nama rukokoma y’itangazamakuru iheruka kubera i Gitega.