Godeliève Nininahazwe yatanguye amabanga y’umushikiranganji wo gufatana mu nda

Godelieve Nininahazwe, aherutse kugenwa mu kibanza c’umushikiranganji wo gufata mu nda, agateka ka zina muntu n’iterambere ridakumira, yarahiye icese imbere y’umukuru w’igihugu n’abashingamateka kuri uwu wa mbere.

Godeliève Nininahazwe, umushikiranganji wo gufatana mu nda, agateka ka zina muntu n’iterambere ridakumira

Mu gatondo ko kuri uno wa mbere, igenekerezo rya 15 Kigarama 2014, umupfasoni Godelieve Nininahazwe yagenwe n’itegeko ry’umukuru w’igihugu inomero 100/288 ryo kw’igenekerezo rya 10 Kigarama 2014, mu mabanga y’umushikiranganji wo gufata mu nda, agateka ka zina muntu n’iterambere rudakumira, niho yarahira icese ko atanguye amabanga aheruka gushingwa. Afashe n’ukuboko kw’ibubamfu ibendera ry’Uburundi n’iryubumwe, umupfasoni Godelieve Nininahazwe, adugije ukuboko kw’iburyo, yarahiye imbere y’umukuru w’igihugu, aho yiyemeza kwubahiriza ibwirizwa shingiro ry’Uburundi, gukorera igihugu mu gutsimbataza amahoro hamwe no guharanira agateka ka zina muntu.

Mukamenya ko uwo mushikiranganji Godelieve Nininahazwe, asubiriye mu kibanza cahoramwo umupfasoni Clotilde Niragira aherutse kugenwa nk’umunyamabanga w’umurwi wo kumenya ukuri no gusubiza hamwe (CVR). Ivyo birori bikaba vyari vyitabwe n’abanyecubahiro batandukanye, aho tukavuga icegera ca mbere c’umukuru w’Igihugu, icegera ca kabiri c’Umukuru w’igihugu, umuhuza w’abarundi, abaserukira ibihugu vyabo mu Burundi, abashingamateka hamwe n’abakenguzamateka.