Karuzi :Ubutare bwa Nickel bugiye gutangura kwimbwa

Uruhusha rwo gucukura ubutare bwa Nickel mu ntara ya Karuzi komine ya Nyabikere rwaramaze gusohoka, ndetse ibikorwa vyo ku bwimba bikaba bigiye n’ugutangura, aho iterambere ry’iyo ntara rigiye kwisununura gusumba.

Ibikorwa vyo gucukura ubwo butare bikazotuma ubutunzi bw’iyo ntara bwiyongera mu gihe yasa n’iyari yarahebwe haraciye imyaka itari mike. Ivyo bikorwa vyo gucukura ubutare bikazotuma umunyagihugu wo mu ntara ya Karuzi n’abo muzindi ntara bahatorera akoyokwe, narirya abanyagihugu atari bake, bazoharonkera ubuzi. Ubwo butare bwa Nickel bumaze kwimbwa, bivurwa ko buzoca buhingurirwa aho nyene muri komine Nyabikere. Anabarabara ya Kijambere nk’ay’indarayi hamwe n’amahinguriro, eka n’umuyagankuba bikaba bishobora kuzoca biboneka muri iyo komine.

Ariko rero mukamenya ko iyo ntara ya Karuzi naho iriko iratera imbere, mu gisata c’indero ho bikigoranye kuko abanyeshure baheba amashure bakiri benshi. Ivyo bikagaragara ku biharuro vyerekana ko mu mwaka w’ishure urangiye, abana bagera ku bihumbi bine n’amajana atandatu na batatu aribo bahevye amashure. Naho buramatari w’iyo ntara ya Karuzi Richard Nzokizwanimana rero ashimishwa n’iyo ntambwe iyo ntara iriko iragerako, abavyeyi n’abanyeshure bakaba bahamagarirwa kumenya ko ishure ari ngirakamaro, kandi intara yabo itazogera kw’iterambere nyaryo batagira incabwenge.