Reta yasohoye ingingo zigenga ibiteramo n’ubunywero mu minsi mikuru

Reta y’Uburundi yafashe ingingo z’umutekano zigenga ibiteramo n’ubunywero mu minsi mikuru irangiza umwaka. Abategura ibiteramo haba mu mihana iwabo, mu bunywero, mu butambiro canke aho hose hazoba hateramiye abantu, basabwa kubimenyesha abajejwe intwaro n’umutekano.

Mu ngingo z’umutekano zafashwe na Reta y’Uburundi, abatunganya ibibanza vyo guteramiramwo (boites de Nuit), bamenyeshejwe ko bategerezwa kwisunga amategeko abigenga, cane cane kwiyemeza ko urwamo rw’indirimbo n’intambo rutumvikana hanze kandi rutabuza ababanyi kuruhuka canke kwikorera ibindi bikorwa.

Abatunganya indirimbo n’intambo hanze mu mpangu, bimwe bita (karaoké), ntibarekuriwe kurenza isaha zine zo mw’ijoro (22h). Reta y’Uburundi ivuga ko iyi ngingo itegerezwa gukurikizwa no mu bibanza batambira mu nzu, ariko urwamo rukumvikana hanze, co kimwe n’abatambira mu miryango iwabo. Naho hazoba hari abajejwe umutekano bariko bacuga imiduga n’amapikipiki, benevyo basabwa gufata ingingo zose zikenewe kugira abasuma ntibace muryahumye.

Muri iryo tangazo, Reta y’Uburundi irahumuriza ko amatara atazocika mu bisagara vyose hamwe no mu ma "quartiers" yo mu gisagara ca Bujumbura, eka n’amazi ntazobura. Bishitse amatara agacika, REGIDESO yatanze inomero zikurikira mwohamagarako. Izo nomero ni 78150017 - 78150150 - 78150015 - 78150062 - 78150062 - 78150055 - 78150316 hamwe na 78150317. Habaye ingorane z’umutekano, abanyagihugu basabwa guhamagara kuri 113 na 118. Izo nomero nyene akaba arizo bohamagarako mu gihe hadutse umuriro, ubusuma, ubwicanyi canke impanuka zo mw’ibarabara.