Ubucuti bwa Kidum na Sat B bugeze kure bwatanguye gute?

Inyuma y’iminsi itari mike Sat B ari kumwe na Kidum mu gihe ca Kenya, ubucuti bwabo bugeze kure. Kidum aramaze kwemera ko Sat b ari umuririmvyi akomeye cane, akamusaba gushishikara.

Bivugwa ko Sat B yoba yamenyanye na Kidum igihe haba umunsi mukuru wa Amstel i Bujumbura ahitwa cercle hellenique. Intango ya vyose, Kidum yoba yaramukije Fariouz aho yari yicaranye na Sat B, Kidum aramutsa Sat B nk’uwutamuzi, koko bishoboka ko yoba atari amuzi. Sat B aca ava hasi umubwira ati : "Mzee Kidum, ni jewe Sat B uhora wumva, none ko umenga unshira kure yawe kandi ndi umwana akeneye uwumufata ukuboko". Bivugwa ko Kidum yaciye atangara cane yumvise ari Sat B yahora yumva, araheza umubwira ati : " Urandondera tuvugane kandi umbabarire sinari ndakuzi."

Sat B abifashijwemwo na Ikoh Multiservice, nta minsi yaheze aca asanga Kidum mu gihugu ca Kenya, maze barakora indirimbo. None aho bigeze, Kidum yatangaje ati : "Sat b satura amabafle ni umu star kandi afise umwete mwinshi. Nakomere ku muheto". Hari umukunzi wa Kidum yaciye amwishura ati : "Ariko jewe nemera wewe Kibido, you are the best...", Kidum nawe amwishura ati : "Sinzokwamaho hano kwisi. Ntegerezwa kuguma ntegura abazonsubirira. Nico gituma aho nciye hose nguma nkorana n’aba jeunes."

N’uko rero gukorana kwa Kidum na Sat b bigiye gukomera cane kuko biboneka ko asigaye amufata nk’umwana ariko ararera kandi amwitayeho. Mu gihe ku magenekerezo ya 19 na 20 hari ibiteramo vy’agakura aho Sat B na Kidum bazoririmba, aho baciye bakorana ico bita "publicité" y’igiteramo. Muri iyo Publicité, Kidum avuga mu gifaransa, Sat B nawe akamusubiramwo mu Kirundi, batwenga cane.

Raba aha munsi uko Kidum na Sat B bakoze publicité y’ibiteramo vya Ikoh Multiservice