Muramvya : Intwazangabo mu giporisi yahanishijwe umunyororo w’imyaka itanu

Aimable MURENGERANTWARI, intwazangabo mu giporisi c’Uburundi, yahora arongoye ikirindiro c’igiporisi c’i Kiganda i Muramvya yahanishijwe igihano c’umunyororo w’imyaka itanu hamwe n’ihadabu y’iamafaranga ibihumbi ijana vy’amarundi. Sentare ijejwe kurwanya abarya ibiturire yamwagirije kuri uwu wa kabiri icaha c’ugukorana n’abadandaza inzoga zitemewe n’amategeko.

Iyo ntwazangabo mu giporisi c’Uburundi yafashwe kw’igenekerezo rya 28 Kigarama 2016, iriko yakira amafaranga agera ku bihumbi mirongo itanu vy’amarundi, amafaranga y’igiturire yari ihawe n’abakora izo nzoza zitemewe n’amategeko, nk’uko vyashikirijwe mu ntahe yo kuri uwu wa kabiri.

Uwagiriwe n’ico caha, intwazangabo Aimable MURENGERANTWARI yategetswe ko ategerezwa gutanga iryo hadabu ry’amafaranga ibihumbi ijana mu kiringo kitarenga iminsi umunani.

Mu gihe iyo minsi yohera ataratanga ayo mafaranga, Sentare yamumenyesheje ko azoca yongerwa uwundi munyororo w’amezi atandatu yiyongera ku myaka itanu y’ugupfungwa yaciriwe.