Urwaruka rw’umugambwe Sahwanya-FRODEBU rusaba ko umugambwe ukurwa mu runani CNARED

Urwaruka ruharanira intwaro rusangi mu mugambwe SAHWANYA-FRODEBU urongowe na Frederic BAMVUGINYUMVIRA rusaba umukuru w’umugambwe gufata ingingo yo gukura umugambwe SAHWANYA-FRODEBU mu runani CNARED-Giriteka.

Mw’ikete ryanditswe n’abaserukira abandi mw’ihuriro ry’urwaruka ruharanira intwaro rusangi mu magambwe Sahwanya-FRODEBU CJD kw’igenekerezo rya 5 Ruhuhuma umwaka wa 2017,urwo rwaruka rumenyesha ko babisavye kuko mu myaka ibiri iheze urunani CNARED rushinzwe,umugambwe FRODEBU n’indongozi zawo bagumye bafatwa nk’imperekeza.

Muri iryo kete,urwaruka rw’umugambwe Sahwanya-FRODEBU ruhurikiye mw’ihuriro CJD rumenyesha ko bamwe mu bagize urunani CNARED-GIRITEKA bagumye berekana akagaye imbere y’umugambwe Sahwanya-FRODEBU hamwe n’indongzi zawo.

Urwo rwaruka rw’umugambwe Sahwanya-FRODEBU urongowe na Frederic BAMVUGINYUMVIRA ,rumenyesha ko rushigikiye umukuru w’umugambwe
mu nzira yose arimwo, haba kwitaba ibiganiro vyose bitunganijwe n’umuhuza Benjamin MKAPA.

Mwomenya ko umugambwe Sahwanya-FRODEBU wamaze kwemeza ko uzokwitaba ibiganiro bitegekanijwe kubera I Arusha muri Tanzaniya kuva kw’igenekerezo rya 16 gushika kw’igenekerezo rya 18 Ruhuhuma,umwaka wa 2017.