Aba JRR bo muri kaminuza bariyamiriza umugambi wo gusambura UPRONA

Urwaruka mparaniramajambere ba Rwagasore biga muri za kaminuza zitandukanye, basohoye urwandiko, aho biyamiriza ingendo yo kuburabuza ibikorwa vy’umugambwe wabo, ndetse n’ukuwegurirara abantu birukanywe burundu.

Nk’uko umukuru w’urwo rwaruka abivuga, Bernard Hakizimana amenyesha ko bashigikiye ibikorwa vyakozwe n’umushingamateka Karori Nditije na Ngayimpenda Evariste vyo kwiyunga. Asaba Reta kuvavanura n’ingendo yo gusambagura imigambwe, ahubwo Reta igasabwa nyabuna gushigikira imigambwe iriko iriyunga nk’uko biri mu masezerano yateweko umukono mu Kayanza.

Muri iryo tangazo, uyo aserukira JRR muri za kaminuza zitandukanye zo mu Burundi, avuga ko abakomerekeye ku Mugumya canke abakubiswe n’ibindi vyose vyononekaye biri ku gatwe ka Concilia Nibigira, umushingamateka Niyoyankana Bonaventure na Gaston Sindimwo, na Reta y’Uburundi, yo irekera umugambwe abantu birukanywe burundu na komite nkuru ya UPRONA, bagirizwaguhemuka.