Abakuru b’ibihugu bashika 30 bishikiye mu gihugu ca Kenya

Umukuru w’igihugu c’Uburundi Petero Nkurunziza ari mu gihugu ca Kenya, aho yaroye kwifatikanya n’abanyagihugu bo muri ico gihugu, mu birori vyo kwibuka imyaka 50, ico gihugu kimaze kironse intahe yo kwikukira.

Muri ivyo birori vyitabwe n’abakuru b’ibihugu bagera kuri 30 hamwe n’ama Reta, umukuru w’igihugu c’Uburundi Petero Nkurunziza ari kumwe n’umutambukanyi wiwe Denise Nkurunziza. Igihugu ca Kenya cakwije imyaka 50 cikukiye, inyuma y’aho ibendera ry’ico gihugu ridugiye, maze iry’igihugu c’Ubwongereza naryo riramanuka, aho hari kw’igenekerezo rya 12 Kigarama umwaka w’1963, inyuma y’umwaka umwe gusa, Uburundi nabwo bwikukiye.

Ivyo birori bikaba vyitabwe n’abatari bake, harimwo abanyeshure bo muri za kaminuza, abari mu mashure yisumbuye na matomato, abari mu mashirahamwe, abakozi mu bisata bitandukanye vy’igihugu n’abandi. Tukabamenyesha ko, umukuru w’igihugu wa mbere, kuva ico gihugu ca Kenya cikukiye ari Jomo Kenyatta, se wa Uhuru Kenyatta, umukuru w’igihugu ahari ubu. Ico gihugu kandi kuva cikukiye, kikaba kimaze kugira abakuru b’ibihugu bane gusa.

Uwatanguye akaba ari Jomo Kenyatta, yatanguye ari umushikiranganji wa mbere mu mwaka w’1963 gushika mu mwaka w’1964, mu nyuma aca atwara ico gihugu kuva mu mwaka w’1964 gushika yitabe Imana mu mwaka w’1978.

Yaciye akurikirwa na Daniel Arap Moi. Uwo mutama n’ubu akiri muzima, afise imyaka 89. Yatwaye kuva mu mwaka w’1978 ashikana mu mwaka w’2002.

Ubwa gatatu naho, hatwaye Mwai Kibaki nawe nyene akiriho. Yatwaye kuva mu mwaka w’2002 ashikana mu mwaka w’2013. Uwo mutama akaba afise imyaka 82 y’amavuko.

Uwa kane, ni Uhuru Kenyatta. Ni umuhungu w’umukuru w’igihugu wa mbere, akaba afise ubu imyaka 51 y’amavuko. Uhuru Kenyatta, yashitse ku butegetsi kuva mu mwaka w’2013, akaba ariko yarabaye n’umushikiranganji wa mbere w’ico gihugu.