Abigisha ibintazi mu mashengero bakwiye gufatwa bakerekanwa hose

Ingorane zitandukanye ziri mu madini mu Burundi, aho bamwe mu barongozi bapfa amafaranga, abandi bagapfa ayandi maronko, n’ayandi mashengero yigisha ibintazi, biri muri bimwe mu vyavugiwe mu nama yahuje umushikiranganji w’intwaro hagati mu gihugu n’abarongoye amadini.

Amadini rero akaba aguma avuka ari mwenshi, bamwe bakabona ko ari iterambere, mu gihe ingorane nazo muri ayo mashengero ziba umuyoro. Hamwe bakaba bapfa amatungo y’ishengero, ahandi naho bakagira urudandazwa amashengero. Ariko ku mashengero amwe amwe amaze kumenyekana ko yigisha ibintazi, ndetse aho hari n’ivyumba vyitirirwa amashengero usanga kenshi bikorerwamwo ibindi biteye isoni, umushikiranganji w’intwaro yo hagati mu gihugu, akaba asaba abo barongoye amashengero kuhabera magabo, bafashanye n’abarongoye intwaro, ako kabi gatuzwe, ndetse abafashwe nabo, bahanwe bimwe vy’akarorero, ndetse banerekanwe hose.

Abari bitavye iyo nama nabo, bakaba baragaragaje amakenga bafise ku bimaze iminsi bivugwa ku bijanye n’ibwirizwa nshingiro, aho havugwa vyinshi, ndetse bimwe ugasanga bitera n’ubwoba abanyagihugu. Kuri ivyo, Edouard Nduwimana avuga ko bidakwiye gusimbisha umutima abarundi canke amakungu, kuko ibwirizwa nshingiro rihari, ariryo rizoguma ryisungwa, gushika umukuru w’igihugu niyavuga ukundi vyogenda.