Afrika y’epfo yasavye ikigongwe Malawi ku majambo ya Jacob Zuma

Umukuru w’igihugu ca Afrika y’epfo, Jacob Zuma yasavye ikigongwe abanyagihugu bo muri Malawi. Igihe yariko ashikiriza ijambo ku banyagihugu ko bokwubaka amabarabara manini manini mu gisagara ca Johannesburg, yavuze ko Johannesburg iri muri Afrika y’epfo, atari muri Malawi, ko hategerezwa kuba amabarabara adasanzwe.

Igihugu ca Afrika y’epfo casavye ikigongwe inyuma y’aho umukuru w’igihugu Jacob Zuma ashikiririje ayo majambo asa n’ayasuzugura igihugu ca Malawi. Igihugu ca Malawi camenyesheje ko n’aho ayo amajambo yashikirijwe n’umukuru w’igihugu ca Afrika y’epfo ari ay’agasuzuguro, bamenyesha ko ataco azokwica ku migenderanire y’ivyo bihugu bibiri, nk’uko vyamenyeshejwe na Quent Kalichero, umuvugizi w’umushikiranganji w’imigenderanire n’ayandi makungu, mu gihe yari aronse insiguro zavuye ku mukuru w’igihugu ca Afrika y’epfo Jacob Zuma.

Jacob Zuma akaba yamenyesheje ko ata ntumbero n’imwe yari afise yo gutuka abanyafrika canke abanyamalawi. Amajambo ya Jacob Zuma akaba yarashavuje cane abo mu mugambwe utavuga rumwe na Reta muri Afrika y’epfo. Mu nyuma, umuvugizi wa Reta yarafashe minenerwe ayo majambo ntiyayavuguruza. Kubw’uwo muvugizi w’ubushikiranganji bw’imigenderanire ya Malawi n’ibindi bihugu, yaciye amenyesha ko imigenderanire y’ivyo bihugu itazohungabana.