Centrafrica : Abasirikare ba Tchad bugururiye umuriro mu banyagihugu

Abasirikare bo mu gihugu ca Tchad barashe abantu benshi mu gisagara ca Bangui, ubwo nyene umunani baca baritaba Imana, abandi nabo barakomereka cane.

Abo basirikare bakaba bakoze ivyo, igihe bari baroye gutahukana abanyagihugu babo bipfuza guhunga umutekano muke uri i Bangui ku murwa mukuru w’igihugu ca Centrafrika. Abo basirikare b’igihugu ca Tchad bakaba barashe mu Buraruko bw’igisagara ca Bangui, aho barashe amasasu menshi cane, hirya no hino, aho ndetse bivugwa ko nico gitigiri c’abantu umunani bapfuye, gishobora kwongerekana. Ubwoba mu banyagihugu bukaba bwari bwinshi, aho ndetse n’abatari bake bahavuye bata baromoka kubera gutinya kuhasiga ubuzima.

Mwomenya ko ivyo bishitse mu gihe kuri uyu wa kane w’indwi iheze, abantu bashika kuri 20, bagandaguwe batewe amagerenade. Umutekano muke rero ukaba uguma wiyongera, naho bimwe mu bihugu vyo muri Afrika harimwo n’Uburundi, biriko birita ku rutare kugira intambara ziri muri ico gihugu zihagarare. Ubu bikavugwa ko n’inteko z’ibihugu vya Buraya zitezwe gufasha muri ico gihugu.