Congo: Impanuka y’indege Itwara Abantu Yahitanye Abantu Batanu

Abategetsi bo muri Republika iharanira Demokrasi ya Congo, muri iki gihe, bavuga kw’impanuka y’indege itwara abantu mu buseruko bw’igihugu yahitanye abantu batanu, inyuma yuko amakuru y’imbere yaho amenyesheje kw’igitigiri c’abantu bapfuye cari kirengeye ngaho cane.

Abategetsi b’igihugu ca Congo, batangaje kw’abantu batatu canke barenga barokotse iyo mpanuka y’indege itwara abantu, Fokker, igihe yagira isanganya, ejo ku musi wa mbere mu gice kibamwo abantu mu gisagara ca Goma, umurwa mukuru w’intara ya Kivu yo mu bureruko.

Iyo ndege yari igiye mu gisagara ca Goma ivuye mu gisagara ca Lodja kiri hagati mu gihugu igihe yakoroka.

Amakuru atangwa n’igipolisi, yatangaje kw’abarokotse iyo mpanuka bariko bavurwa mu bitaro.

Umuvugizi w’ishirahamwe mpuzamakungu ONU, muri Congo, alexander Essome, yabwiye Ijwi rya Amerika, kw’akarere iyo ndege yagiriyemwo impanuka, karangwa n’ibihe bibi, igihe iyo mpanuka yaba.