FRODEBU Nyakuri : Edouard Nduwimana yashatse gushimisha uwamushize muri Reta

Mu kuvuga ko abashaka guhiganirwa ikibanza c’umukuru w’igihugu boshira mu mutwe ko bazohiganwa n’umukuru w’igihugu Petero Nkurunziza, umushikiranganji w’intwaro yo hagati mu gihugu Edouard Nduwimana yoba yashatse gushimisha uwamushize muri Reta. Ku ruhande rw’umugambwe CNDD FDD n’uruhande rw’umukuru w’igihugu Petero Nkurunziza, nta n’umwe yemera ko yamutumye kubishikiriza.

Mu nama yahuje umushikiranganji w’intwaro yo hagati mu gihugu n’abarongoye amashengero atandukanye ku munsi wa mbere, Edouard Nduwimana yarahebuje abahora bavuga ko umukuru w’igihugu Petero Nkurunziza n’umugambwe CNDD FDD batorenga ku masezerano y’i Arusha. Muri iyo nama, umushikiranganji Edouard Nduwimana yamenyesheje ko Petero Nkurunziza ariko atwara mu kiringo ca mbere, ari naco gituma asigaranye ikindi kiringo. Nk’uko Edouard Nduwimana yabisiguye, sentare yubahiriza ibwirizwa shingiro niyo yonyene izovuga namba ukwitoza kwa Petero Nkurunziza kutubahirije amategeko.

Abanyeporitike bumvise iyo mvugo baratangajwe n’ukwitanganiza kwa Edouard Nduwimana ku kibazo kitari rwiwe. Bati : "Yoba ari umuvugizi w’umukuru w’igihugu? Canke niwe avugira umugambwe CNDD FDD ko ariwo uzovuga uwo wagenye kuwuserukira mu matora y’umukuru w’igihugu? Yoba avugira sentare yubahirizwa ibwirizwa shingiro ko nayo nyene itarabazwa ibijanye n’ico amategeko avuga ku kwitoza kwa Nkurunziza?"

Muganga Yohani Minani arongoye umugambwe FRODEBU Nyakuri amenyesha ko mu kwishura ku kibaza bitaraba ubushikiranganji arongoye, umushikiranganji Edouard Nduwimana yashatse gushimisha n’ukwitonesha kuwamushize muri Reta.