Gabon : Umushikiranganji atemera ivyavuye mu matora yatanze imihoho

Mu ntumbero y’ukwerekana ko atemera ivyavuye mu matora y’Umukuru w’Igihugu muri Gabon, aho umurwi w’igihugu ujejwe gutegura amatora watangaje ko umukuru w’igihugu Ali Bongo ariwe yatahukanye intsinzi, umushikiranganji w’ubutungane, Seraphim Moundounga, yahisemwo gutanga imihoho muri Reta.

Imbere y’uko afata ingingo y’ugutanga imihohoho, umushikiranganji Moundounga yoba yari yarabanje kubwira umukuru w’igihugu Ali Bongo ko nibatemera gutangaza ukuri kw’ivyavuye mu matora, bizotesha agaciro igihugu. Seraphim Moundounga niwe muyobozi wa mbere mu nzego zo hejuru muri Gabon atanze imihoho kubera ivyavuye mu matora yazanye intureka muri Gabon, imyiyerekano hamwe n’imishamirano hagati y’abayboka umukuru w’igihugu Ali Bongo, hamwe n’aba Jean Ping avuga ko amatora yibwe.

Seraphim Moundounga, umushikiranganji w’ubutungane muri Gabon yatanze imihoho

Ubuyobozi bwa Gabon buvuga ko abantu batatu aribo bapfuye, abagera ku 105 barakomerekera mu mvururu n’itabwa muri yompi vyakurikiye itangazwa ry’amajwi. Aho ni mu gihe abagera ku majana umunani bamaze gutabwa muri yompi, abandi batamenyekana igitigiri baburirwa irengero.

Umurwi w’igihugu ujejwe gutegura amatora watangaje ko umukuru w’igihugu Ali Bongo ariwe yatsinze amatora ku majwi 49.8 kw’ijana, mu gihe Jean Ping nawe yatahukanye ibice 48.2 kw’ijana.