Kirundo : Izunguruka ry’inoti z’ibihumbi bitanu za magendo ziragisibije

Inoti za magendu ziragisibije mu ntara ya Kirundo, ndetse abajejwe intwaro muri iyo ntara bakaba basavye abanyagihugu kurikanura.

Buramatari w’intara ya Kirundo, Reveriyano Nzigamasabo yasavye abanyagihugu kurikanura, mu gihe inoti z’amafaranga ibihumbi bitanu ziriko zirazunguruka mu makomine nka yose agize iyo ntara. Izo noti zikaba ari iza magendo, nk’uko uyo mutegetsi abivuga. Ivyo bikaba bivuzwe mu gihe muri komine ya Busoni, imwe mu makomine agize iyo ntara, inoti zigera kuri 50 z’amafaranga ibihumbi 5 zafashwe haraheze indwi zibiri.

Mu nama buramatari w’iyo ntara yagiranye na ba musitanteri bose mu ntumbero yo gutegura umunsi mukuru wahariwe amakomine, akaba yasavye ba musitanteri ko bobwira abanyagihugu barongoye kumera magabo, ku noti z’amafaranga ya magendo y’ibihumbi 5 ariko arazunguruka muri iyo ntara. Mwomenya ko no mu mabanki akorera muri iyo ntara bemeza ayo makuru y’izo noti.