Mali: Abasirikare ba Tchad na Niger bagiye gushika mu gihugu

Abasirikare ba Tchad bari kumwe n’abasirikare ba Niger bagiye gushika mu gihugu ca Mali.Abo nabo igikorwa cabo akaba ari ukubuza abarwanyi b’aba islam gushika mu misozi yo m’uburaruko bushira ubuseruko bwa Mali.

Mw’ijambo ryo kubahanura umukuru w’igihugu ca Tchad Idriss Deby Itno yabashikirije imbere y’uko bafata urugendo baja mu gihugu ca Mali, yababwiye ko bagiye kugwanya umwansi adashaka gukiza ubuzima bwiwe, ari umwansi azi ko gupfa bisigura kuja muri paradizo,rero ko bakwiye kuhabera magabo.

Nk’uko amakuru ava mu gisirikare ca Tchad abimenyesha,ngi igikorwa c’abo basirikare ni ico gufata Gao bakongera bagashinga ibirindiro muri Kidal.Nk’uko ayo makuru abandanya abimenyesha ngo intumbero ni iyo kubuza indwano mu karere karimwo imisozi hafi y’urubibe igihugu ca Mali gihana na Algerie.

Tubamenyese ko abo basirikare barenga 2500, nayo abasirikare bo mu gihugu ca Tchad bakaba barongowe na General Oumar Bikimo yahoze arongoye abasirikare bari mu gihugu ca Centrafrika haraheze amezi make,azofashwa kandi n’abandi ba General babiri, Abderahmane Youssouf Meiry na Mahamat Idriss Deby Itno,umuhungu w’umukuru w’igihugu ca Tchad.