Misiri : Mohamed Morsi yarasibije urugendo rwiwe mu Bufaransa

Mohamed Morsi, umukuru w’igihugu ca Misiri yarasibije urugendo rwiwe rwo mu Bufaransa nkuko yari yabiteguye mu mpera z’iyi ndwi.

Imigenderanire hagati y’umukuru w’igihugu ca Misiri hamwe na mugenzi we w’u Bufaransa Francois Hollande ntiyari myiza, nico gituma kuri uyu wa gatanu igenekerezo rya 1 Ruhuhuma batazobonana.

Nk’uko Elysee ibimenyesha, umukuru w’igihugu ca Misiri yahisemwo gusivya uwo mubonano i Paris. Yari kwakirwa n’Umushikiranganji ajejwe abavuga ururimi rw’igifaransa Yamina Bengwigwi ku kibuga c’indege kuwa kane agaca abonana na Francois Hollande bukeye. Urugendo rwiwe rwo mu Budagi rwo kuwa gatatu no kuwa kane narwo nyene ruzoba urw’amasaha make cane.

Umukuru w’igihugu ca Misiri ngo yafashe iyo ngingo kuva aho aboneye ko ibintu bitifashe neza mu gihugu ciwe. Igisirikare ca Misiri cari cagabishije ko ibintu mu gihugu bitameze neza bijanye n’ingorane zari zimaze imisi mu gihugu.

Abantu bagera kuri 50 baritavye Imana mu misi y’imigumuko yiyamiriza ubutegetsi yabaye imisi 5 iheze.

Mohamed Morsi ari mu bakuru b’ibihugu bake batashigikiye intwazangabo z’abafaransa muri Mali kuko kubwiwe yabona ko vyagira bitere imigumuko mu gihugu.