Accueil > Amakuru > Poritike > MRC-Rurenzangemero: Haratowe indongozi z’urwaruka
MRC-Rurenzangemero: Haratowe indongozi z’urwaruka
mardi 4 Ruheshi 2013
Umugambwe MRC-Rurenzangemero yaratunganije ku musi w’Imana igenekerezo rya 2 Ruheshi 2013, ikoraniro ryo ku rwego rw’igihugu ry’urwaruka rwo muri uwo mugambwe.
Intumbero y’iryo koraniro ikaba kwari ugutora umukuru n’icegera vy’urwego rw’urwaruka rwo mu mugambwe MRC-Rurenzangemero bita « Abahizi »
Muri ayo matora yari yitabwe n’abaserukira urwaruka rwo mu ntara zose zigize igihugu c’uburundi, Eric Nkenguburundi niwe yizewe mu kibanza c’uwutwara urwaruka ku rwego rw’igihugu, icegera ciwe akaba ari Jean Pierre Nshimirimana.
Mu vyafatirwako kugira uwitoza aje mu bibanza vyo guhiganwa, basaba ko boba bamaze n’imiburiburi imyaka itatu muri uwo mugambwe. Abari ngaho bakaba barakeje abahejeje kwizerwa.
Eric Nkenguburundi, umukuru mushasha w’ « abahizi » yarakengurukiye abamwizeye, asaba urwaruka rwo muri MRC-Rurenzangemero gukurikiza akarangamutima k’umugambwe, mu gushira imbere ibikorwa vy’iterambere.
Ku ruhande rwiwe, umukuru w’umugambwe MRC-Rurenzangemero ku rwego rw’igihugu, Epitace Bayagabakandi yahamagariye urwaruka rwo muri uwo mugambwe kwitegurira neza amatora yo mu mwaka w’2015 hamwe no kwijukira amashure kugira bashobore guhiganwa n’abandi mu buzi.
- Umukuru w’umugambwe MRC-Rurenzangemero ku rwego rw’igihugu, Epitace Bayagabakandi
Yarangije yibutsa urwo rwaruka ko umugambwe MRC-Rurenzangemero ushira imbere ibikorwo, aboneraho n’akaryo ko kubasaba kwijukira gukorera mu mashirahamwe babashe kwiteza imbere.
Egide Nduwimana
