Accueil > Amakuru > Muri Afrika > Nigeria : Abantu 118 baguye mu gitero c’abihevyi
Nigeria : Abantu 118 baguye mu gitero c’abihevyi
mercredi 21 Rusama 2014
Abantu bashika 118 nibo bishwe abandi 56 barakomereka ku munsi wa kabiri mu gitero c’abihevyi kw’isoko ry’ahitwa i Jos, mu gihugu ca Nigeria.
Naho amakungu yose yagerageje kwamirira kure ibikorwa vy’uwo muhari w’intagondwa za Boko Haram, ku munsi w’ejo kuwa kabiri igenekerezo rya 20, izo ntagondwa zasubiye kwiha inkumbi mu gitero cahitanye abantu 118, hamwe n’abandi 56 kw’isoko ry’i Jos, muri Nigeria. Hari n’ayandi makuru avuga ko hashobora kuba hakiri ibiziga bikiri mu bibomoka.
![](local/cache-vignettes/L642xH428/har-2-b6554.jpg?1519969832)
Nk’uko bivugwa na Pam Ayuba, umuvugizi wa buramatari w’ako karere kaberemwo igitero, abapfiriye muri ico gitero abenshi ni abakenyezi. Naho abatari bake baneguye umukuru w’igihugu ca Nigeria kuba ata kintu kiboneka ariko arakora muri kino gihe hari ingorane mu gihugu arongoye, Goodluck Jonathan yiyamirije abo bagizi ba nabi. Uwo mukuru w’igihugu ca Nigeria avuga ko Reta yiwe yiyemeje kurwanya yivuye inyuma iterabwoba.
Floxella Karire