Nigeria : Igipolisi cabujije imyiyerekano yose ku banyeshure banyurujwe

Kubera ko hamaze iminsi haba ibitero bitari bike muri aya mezi aheze, igipolisi ca Nigeria cabujije ko haba imyiyerekano yose igamije gushigikira ba banyeshure 200 banyuruzwa n’ abarwanyi ba Boko Haram ku bw’imvo z’umutekano.

Kuri uno wa mbere, igenekerezo rya 2 Ruheshi, umunsi umwe gusa inyuma y’igitero c’igisasu caturitse mu Buraruko bushira Ubuseruko bw’igihugu ca Nigeria, igipolisi c’i Abuja carabujije ko hasubira kubaho imyiyerekano yarimaze igihe, iba mu bice vyinshi vy’igihugu bise ‘’Bring back our girls’’mu ntumbero yo gushigikira ba banyeshure 223 banyuruzwa n’umugwi wa Boko Haram, basaba irekurwa ryabo. Igipolisi kikaba catanze insiguro ko muri iyo myiyerekano hashobora kuba ikindi gitero c’abihevyi.

Iyo ngingo ikaba itanezereye abateguye iyo myiyerekano aho bibaza ko hashobora kuba harimwo imvo za poritike, ariko umukuru w’igipolisi Ozefu Mbu yamesheje ko ari ku mvo zogufata ingingo zishoboka zose kugira izo nkozi z’ikibi ntizisubire gutera ibitero zihitana abantu.