Somaliya : Abakozi ba ONU bagandaguriwe ku kibuga c’indege

Abakozi b’ishirahamwe mpuzamakungu ONU mu gihugu ca Somaliya barishwe, bicirwa ku kibuga c’indege c’ i Galkayo mu karere ko Hagati muri ico gihugu, barashwe.

Abo bakozi b’ishirahamwe mpuzamakungu ONU umwe ava mu gihugu c’Ubufaransa uwundi nawe akavuga mu gihugu c’Ubwongereza. Nk’uko bishikirizwa na Nicholas Kay aserukira ishirahamwe mpuzamakungu ONU aho muri Somaliya, abo banyamahanga bagandaguriwe muri ico gihugu ca Somaliya, bari abakozi bakuru bo mw’ishirahamwe mpuzamakungu ONU aho muri Somaliya, bakora mu gisata co kurwanya ibiyayuramutwe n’ubwicanyi.

Uwoba yaragandaguye abo bategetsi b’ishirahamwe mpuzamakungu ONU bivugwa ko yoba yari yambaye impuzu za giporisi, ariko bikavugwa ko yoba yari afise akagorane mu mutwe, ariko kandi bikavugwa ko yoba yarafashwe. Abo bagandaguriwe muri ako karere ka Galkayo, bakaba bari baroyeyo mu rugendo rw’akazi rw’iminsi ibiri, aho bategerezwa kubonana n’abategetsi batandukanye.