Sudani: Amashirahamwe mpuzamakungu ariko aratabariza Meriam Yehya Ibrahim

Ababuranira umugore wo muri Sudani yaciriwe umunyororo wo kwicwa azira ko yubakanye n’umugabo w’umukirisu, bamenyesha ko uwo mupfasoni yavyariye mw’ibohero, inyuma y’aho aterewe muri yompi.

Meriam Yehya Ibrahim n'umutambukanyi wiwe Daniel Wani

Uwo mugore asanzwe yubakanye n’umugabo w’umukirisu yaciriwe urubanza rwo kwicwa mu ntango z’uku kwezi kwa Rusama i Khartoum ku murwa mukuru wa Sudani, inyuma yaho yanse guhakana idini ry’abakristu. Sentare ikaba yaciye ifata icemezo c’uko azicwa amanitswe, inyuma y’aho yaramaze imyaka 2 yubatse, none Imana ikaba yamuhaye umwana.

Twobamenyesha ko uwo mugore yakuze ari umukirisu, ariko abategetsi bo muri Sudani bakamufata nk’umusiramu, kuko ariryo dini rya se, naho atariwe yamureze kuva mu bwana bwiwe. Abaharanira agateka ka zina muntu muri ico gihugu, bakavuga ko ari akamaramaza, aho umuntu ashobora gucibwa urubanza nk’urwo, azira ukwemera kwiwe.

Meriam Yehya Ibrahim akaba yubakanye na Daniel Wani wo muri Sudani y’amaja Epfo wo mw’idini ry’abakirisu. Amashirahamwe mpuzamakungu n’ayo mu karere, yose akaba yahagurukiye rimwe mu gutabariza ko uwo mupfasoni yotabarwa, ntiyicwe amanitswe mu kuzira uburenganzira bwiwe.