CECAFA U17 : Umurwi wa Zanzibar wakuwe mw’ihiganwa, Etiyopiya utsindwa impaga

Yanditswe na MUGISHA Van Naris
Kuya 16 avril 2018 saa 11:53
Yasomwe :
0 0

Inama nkuru y’umugwi w’Ishirahamwe CECAFA utegura ihiganwa ry’abana batarenza imyaka 17,ririko ribera mu Burundi yakuye mw’ihiganwa murwi wa Zanzibar, umurwi wa Etiyopiya nawo uwuhanisha gutsindwa impaga, kubera ugukinisha abakinyi barenza imyaka.

Mu nama yahuje abagize umurwi utegura ihiganwa rya CECAFA yabaye inyuma y’inkino zo kur’uyu w’Imana igenekerezo rya 15 Ndamukiza 2018, umurwi wa Zanzibar wahanishijwe kandi gutanga ihadabu y’ibihumbi 15 vy’amadorare y’abanyamerica ,gusubiza amafaranga yaguzwe amatike y’indege n’ibindi vya nkenerwa bakoresheje kuva bagishika mu Burundi, wongera uhagarikwa umwaka.

Ku ruhande rw’umurwi wa Etiyopiya, hejuru yo gutsindwa impaga ku rukino rwari rwawuhuje na Somaliya, abakinyi bawo batatu bahagaritswe mu rukino baca bakurwa kandi mw’ihiganwa.

Izo ngingo zatumye ikirangaminsi c’inkino za CECAFA z’abatarenza imyaka 17 gica gihinduka, aho urukino rwari rutegekanijwe kubera i Muyinga kw’igenekerezo rya 22 Ndamukiza 2018, ruhuza Tanzaniya na Sudani, ruzobera i Gitega kuri iryo genekerezo nyene.

Mu vyahindutse kandi harimwo amasaha inkino zitangurirako, ubu inkino zikaba zigiye kuza ziratangura igihe c’isaha icenda, mu gihe zahora zitangura isaha icenda n’igice.

Imirwi umunani, Uburundi, Tanzaniya, Zanzibar, Somaliya, Etiyopiya, Sudani, Ubuganda na Kenya, n’iyo yari yitavye iryo higanwa, ririko ribera mu ntara za Ngozi, Muyinga na Gitega.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha