Ligue des champions : Real Madrid na Liverpool yaronse uburenganzira bwo gukina igica ca 8 gishira ica nyuma

Yanditswe na MUGISHA Van Naris
Kuya 7 mars 2018 saa 09:14
6105
0 0

Inkino zo gusubiriza mu gice ca 16 gishira ica nyuma mw’ihiganwa rihuza imirwi yabaye iya mbere mu bihugu vyayo ku mugabane wa Buraya zaratanguye kur’uyu wa kabiri igenekerezo rya 6 Ntwarante 2018. Umurwi Real Madrid wo mu gihugu ca Espagne na na Liverpool wo mu Bwongereza niyo mirwi ibiri ya mbere yaronse uburenganzira bwo gukina igice c’umunani gishira ica nyuma.

Mu rukino rwa mbere rwo gusubiriza, umurwi Real Madrid watsinze Paris Saint Germain wo mu Bufaransa ibitsindo bibiri kuri kimwe, mu gihe mu rukino rwo gutangura, Real Madrid yari yatsinze Paris Saint Germain ibitsindo bitatu kuri kimwe.

Igitsindo ca mbere c’umurwi Real Madrid cinjijwe na Christiano Ronaldo ku munota wa 58 agitsinze n’umutwe, inyuma y’ikosa ryakozwe n’umukinyi w’inyuma Dani Alves, naho ku munota wa 71, Edinson Cavani yahavuye akigombora,mu gihe igitsindo ca kabiri ca Real Madrid cinjiye ku munota wa 80 cinjijwe na Casemiro.

Ni urukino rwari rurindiriwe n’abakunzi b’umupira w’amaguru kw’isi, kuko bashaka kuraba ko umurwi Paris Saint Germain ukora ibitangaza ugatsinda umurwi Real Madrid, naho wari ubuze umukinyi wawo rurangiranwa Neymar Junior.

Mu rundi rukino, umurwi Liverpool wo mu Bwongereza wanganije n’umurwi FC Porto wo muri Portugal ubusa ku bundi, mu gihe mu rukino rwa mbere,umurwi Liverpool wari watsinze ibitsindo bine ku busa.

Mu nkino zitegekanijwe kur’uno wa gatatu igenekerezo rya 7 Ntwarante 2018, umurwi Manchester City wo mu bwongereza uza gukina na FC Bale , mu gihe umurwi Tottenham wo mu Bwongereza uza gukina na Juventus de Turin wo mu Butariyano.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha