Uburundi bugiye kwakira inkino za gisirikare zihuza ibihugu vya Afrika y’Ubuseruko

Yanditswe na MUGISHA Van Naris
Kuya 21 Myandagaro 2017 saa 12:40
Yasomwe : 10431
0 0

Kuva kw’igenekerezo rya 24 Myandagaro gushika kurya 6 Nyakanga 2017, Uburundi buzokwakira inkino za gisirikare zihuza ibihugu vyo mu karere ka Afrika y’Ubuseruko. Umuvugizi w’ubushikiranganji bwo kwivuna abansi Colonel Gaspard BARATUZA ahamagarira ababa mu gisagara ca Bujumbura kuza gushigikira imirwi izoserukira Uburundi.

Mu kiganiro yahaye abamenyeshamakuru kuri uyu wa mbere igenekerezo rya 21 Myandagaro 2017, Colonel Gaspard BARATUZA avugira ubushikiranganji bwo kwivuna abansi amenyesha ko izo nkino zihuza abasirikare bo mu karere ka Afrika y’Ubuseruko zitunganywa mu ntumbero yo guhuza abasirikare kugira bamenyerane.

Colonel Gaspard BARATUZA avuga ko bisunze uko abakinyi baserukira Uburundi bagiye barigenza mu mahiganwa amaze gutunganya, bagafatira kandi ku kungene bariko baritegura, biteze ko abakinyi baserukira Uburundi bazokwitanga.

Yavuze ati :«Imirwi y’Uburundi igeze ku rugero rwiza, twizeye ko abakinyi bacu bazotahana ikibanza ciza muri aya mahiganwa

Colonel Gaspard BARATUZA avugira ubushikiranganji bwo kwivuna abansi amenyesha kandi ko hateguwe imirwi izokwerekana imvyino n’intambo zo mu bihugu bizokwitaba ayo mahiganwa.

Ku bijanye n’umutekano w’abazokwitaba inkino, Colonel Gapard BARATUZA yavuze ko ingingo zose zikenewe kugira umutekano uzobe ukingiwe neza zafashwe, kandi ko n’abazoja gushigikira imirwi umutekano wabo uzoba ucunzwe neza.

JPEG - 36.2 ko
Col Gaspard BARATUZA,umuvugizi w’ubushikiranganji bwo kwivuna abansi

Izo nkino zitunganijwe ku ncuro ya 11 zizokwitabwa n’ibihugu bitanu, Uburundi buzokwakira ihiganwa, Tanzaniya, Kenya, Ubuganda n’igihugu ca Sudani y’Ubumanuko kizokwitaba nk’ikije kurorera, kuko ari irya mbere kizoba citavye iryo higanwa. Urwanda rukaba rutazoserukirwa muri izo nkino zizobera i Bujumbura.

Uburundi bwakiriye izo nkino ku ncuro igira kabiri, inyuma y’aho umwaka wa 2011 aho bwakiriye izo nkino ku ncuro ya mbere.


Kumenyekanisha

1
bigabo 22-08-2017 à 09:57

Nta mukinnyi wo mu Rwanda waza i Burundi, kurebe iki se ? Umutekano se !!!!!!!, iki koko !!!!!

2
Kararuza 21-08-2017 à 16:27

Arabura kutubwira ko Intwazangabo 7 z’u Burundi ejo ziciwe muri Somalie akatubwira ivy’inkino?

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha