Ebola : Uwararongoye intumwa za ONU muri Guineée yitavye Imana

Uwararongoye intumwa za ONU ,ziri gufasha kurwanya indwara ya Ebola mu gihugu ca Guinée yitavye Imana kuri uno wa mbere.

Uwo nawe yari umunyarwanda azwi kw’izina rya Marcel Rudasingwa, akaba yari yagenwe mu kwezi kwa Gitugutu uno mwaka n’umunyamabanga mukuru w’ishirahamwe mpuzamakungu ONU Ban ki Moon. Marcel Rudasingwa yaturuka mu gihugu c’ Urwanda ,akaba yitavye Imana afise imyaka 59 y’amavuko. Umwe mu bakozi b’ishirahamwe mpuzamakungu ONU akavuga ko atigeze avuga ko hari n’aho yumva ababara. Bakaba barindiriye ibipimo vyo kwa muganga bimenyeshe icamuhitanye icari co. Ariko amakuru ava muri Reta yo, yoba avuga ko yoba yahitanywe n’indwara y’umutima.

Tubamenyeshe ko uwo muhisi yari amaze imyaka 20 yose akorera mu bihugu bitandukanye vyo muri Afrika, nko mu gihugu ca Kenya, Mali hamwe na Guinee. Uwo muhisi kandi yarakoze mw’ishirahamwe mpuzamakungu ryitaho agateka k’abana UNICEF.