Gitega : Mu mugambwe MSD barahiye gusubira kwitaba inama za buramatari

Mu mugambwe MSD mu ntara ya Gitega, bamenyesha ko kuva bavuye mu bihano bari bafatiwe vy’amezi ane, n’ubu hari icuka kibi hagati yabo n’umugambwe CNDD-FDD userukiwe na bamwe mu batware, ari naco gituma bafashe ingingo yo guhagarika kwitaba inama zose za buramatari ziraba abanyamigambwe.

Mu kiganiro yahaye ikinyamakuru IGIHE, umukuru w’uyo mugambwe MSD mu ntara ya Gitega Epithace Nshimirimana, akaba yavuze ko umubano wabo n’umugambwe CNDD-FDD wifashe nabi cane mu gihe bamwe mu bategetsi bava muri uyo mugambwe uri kubutegetsi bivanga mu matunganywa y’imigambwe. Ku bwa Epithace Nshimirimana rero, iyo nyifato mbi ibandanije, ibintu bigashobora kuzotuma umubano wabo na CNDD-FDD uguma umeze nabi cane.

Umukuru w’umugambwe MSD akavuga ko n’ubu bakiburagizwa mu bikorwa vyabo, aho ndetse bamwe mu bajejwe intwaro muri iyo ntara bari mu bababuragiza. Uwo mukuru w’umugambwe muri iyo ntara akavuga ko inama buramatari ahora atumako ari nk’uruhendo, mu gihe ivyo bumvikana atarivyo bihava ngo bije mu ngiro. Epithace Nshimirimana akavuga ko baciye bafata ingingo yo guhagarika ibikorwa vyose vyo kwitaba inama ziraba imigambwe zose zitumwako na buramatari w’intara ya Gitega.

Avuga ko izindi nama bazozitaba nk’iz’amashirahamwe akurikirana ivy’amatora canke ayandi mashirahamwe. Yemeza ko mu nama zigera kuri zitatu zose bumvikanye ko bagiye kuzokorana neza hagati y’abajejwe intwaro n’imigambwe, buramatari wenyene akemeza ko atawe azosubira kubuza gukora, ariko bagakurikiza amategeko. Muri MSD rero mu ntara ya Gitega bakemeza ko ayo mategeko bayakurikije, ariko atakivamwo.

Umukuru w’umugambwe MSD mu ntara ya Gitega akaba yamenyesheje ko ivyo vyose ariko bitazobaca inkokora naho babona ataho bari bwiture,mu gihe avuga ko n’umurwi CENI boririye wamaze kwerekana ko ari umurwi ukorera umugambwe CNDD-FDD, atari umurwi uriko ukorera inyungu z’abanyamigambwe bose.

Mukamenya ko ivyo bishitse mu gihe bamwe mu banywanyi b’umugambwe MSD bavuga ko batotezwa no mu ntara ya Ngozi, abo nabo bakagirizwa ko umukuru w’umugambwe MSD Alexis Sinduhije mu guhunga yoba yaherekejwe n’abo banywanyi. Georges Havyarimana umwe muri abo banywanyi, akavuga ko asigaye arara ntibuca, aho yagirizwa ko ariwe yafashije Sinduhije mu gushika mu gihugu c’Urwanda igihe yahunga igihugu.

Uwo munywanyi rero akavuga ko rumwe mu rwaruka rw’Imbonerakure z’aho i Ngozi hamwe n’abakorera urwego rw’igendereza bari mu batakimuha agahengwe, aho yemeza ko aho ahagaze hose aba acunzwe, agasaba ko uburenganzira bwiwe bworeka guhungabanywa.