UPD Zigamibanga : Inyuma y’indyane bari bamazemwo igihe bitoreye indongozi

Mw’ikoraniro kaminuza ryahuje abanywanyi b’umugambwe UPD Zigamibanga bahurikiye mu mashami abiri yari amaze igihe adacana uwaka, batoye Zedi Feruzi kugire abe umukuru w’umugambwe UPD Zigamibanga.

Muri iryo koraniro ridasanzwe ryari ryitabwe n’abanywanyi b’uyo mugambwe bari bamaze igihe bari mu mashami abiri adacana uwaka, rimwe rya Zedi Feruzi ryari ryemewe n’umushikiranganji w’intwaro yo hagati mu gihugu hamwe n’irindi rya Chauvineau Mugwengezo ritari ryemwe n’ubwo bushikiranganji, yose akaba yari yagiye hamwe kuri uyu wa 22 Ruhuhuma, maze atunganya iryo koraniro, ryaciye ribaha indongozi bose bitoreye kandi bahurizako.

Zedi Feruzi yatowe n’Abazigamabanga kugira abe umukuru w’umugambwe, Chauvineau mugwengezo aba umukuru w’umugambwe w’iteka nayo Marina Barampama yahoze mu mugambwe CNDD FDD ndetse akaba yaranabaye icegera ca kabiri c’umukuru w’igihugu, aba umunyamabanga mukuru w’uwo mugambwe.

Muri iryo koraniro, amajambo yose yagiye arashikirizwa, akaba kwari ugushima intambwe ishimishije uwo mugambwe wari uhejeje gushikako mu kwiyunga, abanywanyi bawo bagaheba ivyabacanishijemwo, bagashira imbere inyungu y’umugambwe wabo. Muri ivyo birori nyene, abanywanyi b’uwo mugambwe basavye umukuru w’igihugu Petero Nkurunziza, ko atohirahira ngo yitoze ubugira gatatu, ko yokwubahiriza amategeko, nk’ibwirizwa nshingiro hamwe n’amasezerano ya Arusha avuga ko ata mukuru w’igihugu c’Uburundi arekuriwe kurenza ibiringo bibiri.