Umunsi mukuru w’intama wahimbajwe mu gisagara ca Bujumbura

Yanditswe na MUGISHA Van Naris
Kuya 1er Nyakanga 2017 saa 10:47
Yasomwe : 7191
0 0

Kuri uno wa gatanu igenekerezo rya mbere Nyakanga 2017, abaislamu bo kw’isi yose bahimbaje umunsi w’Intama Id’El-Hadji. Mu gisabisho cabereye ku musigiti uri muri quartier Asiatique aho benshi bazi nko mu carabu canke kwa Kadhafi, uwari arongoye igisabisho yahamagariye aba islam baronse ivyo guhimbaza umunsi mukuru gusangira n’abatabironse.

Kuva igihe c’isaha icumi na zibiri n’iminota 50, aba islam bavuye mu bice bitandukanye vy’igisagara ca Bujumbura bari bamaze gutangura kwijira mu musigiti bitirira Malikaz canke abandi bazi nko kwa Kadhafi, mu kurindira ko isaha imwe n’igice z’igitondo ishika kugira batangure amasengesho nyezina.

Uwari arongoye igisabisho yibukije ico umunsi wa Id’El-Hadji usigura ku ba islam, aca asaba ko abo Imana yahezagiye bakaronka igitungwa babaga kuri uno munsi bokwibuka gusabikanya n’abataronse.

Ati: «Uwu munsi twibuka aho Aburahamu yagomba abage umwana wiwe Isaka ngo amutangeko ikimazi, ariko Imana ica ikora igitangaza gikomeye imurungikira intama ibagwa mu kibanza c’umwana wiwe Isaka

Yongeye ati : «Nico gituma rero umu Islam wese abishoboye ahamagarirwa kubaga igitungwa, igice kimwe akagifungura ikindi akagisangiza abatashoboye kuronka igitungwa. Nkahamagarira umu islam wese ko niyabona uwuje kumusaba kutamwirengagiza kuko azoba ari intumwa y’Imana.»

RUKUNDO Ismail yaje avuye mu Kanyosha yavuze ko ari umunezero kuko ashikiriye umunsi wo guhimbaza umunsi w’intama akiri muzima.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha