Kanyankore Gilbert batazira Yaounde yirukanywe n’umugwi wa FC Bugesera

Umunyamabanga w’umugwi FC Bugesera, Mbonigaba Silas yamenyesheje ko bahisemwo kwirukana Kanyankore Gilbert imbere y’uko ihiganwa ritangura bitumwe no kwigenza nabi mu gikorwa yari ajejwe.

Silas Mbonigaba yagize ati : “Kanyankore twatandukanye. Twakoranye neza umwaka uheze, ndetse n’umrwi yitwaye neza bituma tumwongerera andi masezerano mashya ariko mbere yo gutangira shampiyona twaricaye tureba imyitwarire ye duhitamo gutandukana hakiri kare aho kuzabikora shampiyona yaratangiye.”

Mbonigaba Silas abajijwe kuvyerekeye ukwigenza nabi kw’uwo mumenyereza, yashuye ati : “Nonese reba nk’ubu ikipe ntiratangira imyitozo, wamushaka uyu munsi ugasanga yagiye, ejo yagiye nta ruhushya mbese twabonye tutazakorana neza duhitamo gutandukana.”

Mu nikino itandatu z’ihiganwa ziheruka, umumenyereza Kanyankore Gilbert yatsinze inkino zitatu, anganya inkino zibiri, atsindwa urukino rumwe n’umugwi wa Mukura VS ivyari vyatumye ubuyobozi bw’uwu mugwi umwongera ikindi kiringo kingana n’umwaka co kumenyereza uwo mugwi, aho yagize kandi n’uruhara mu kugura abakinyi uyo mugwi waheruka kuzana.

Tubibutse ko Kanyankore Gilbert batazira Yaounde amaze imyaka irenga 30 ari umumenyereza mu migwi itandukanye yo mu Burundi no mu Rwanda nka Vitalo’0 yo mu Burundi, Les Citadins ubu yitwa AS Kigali, Rayon Sports, Kiyovu Sports, APR FC hamwe n’umugwi nserukiragihugu w’Uburundi Intamba mu rugamba akaba kandi yarabaye n’umwigisha w’umupira w’amaguru mw’ishure rikuru nderabigisha ry’i Kigali (KIE:Kigali Institute of Education).