Ubuyobozi bwa Aigle Noir FC bwakiriye neza ingingo yafashwe n’umumenyereza w’uwo murwi

Yanditswe na Egide NDUWIMANA
Kuya 21 Ndamukiza 2018 saa 10:14
12330
0 0

Ubuyobozi bw’umurwi wa Aigle Noir FC wo mu ntara ya Makamba bumenyesha ko bwakiriye neza ingingo yafashwe n’umumenyereza w’uwo murwi, yo kwirukana abakinyi bagera ku ndwi bagirizwa ko batubahirije amabwirizwa bahawe ku bijanye n’ukwitegurira inkino zisigaye mw’ihiganwa rya Primus Ligue hamwe n’igikombe c’umukuru w’igihugu. Ubwo buyobozi buvuga ko butazokwihanganira abakinyi badashaka kwubahiriza amategeko y’umumenyereza.

Inyuma y’ingingo y’ukwirukana abakinyi indwi mu murwi Aigles Noir FC, ubuyobozi bw’uwo murwi bwashikirije kandi ko imirwi ikeneye abo bakinyi isabwe kwegera umumenyereza mukuru kugira ayibwire ibisabwa kugira igure abo birukanwe.

Ku bijanye n’umukinyi NDAYISHIMIYE Yussufu yategerezwa kuja gukina mu yindi mirwi hanze y’igihugu, ubuyobozi bwa Aigle Noir FC buvuga ko ibiganiro vyamaze gutanguye kugira asubirizwe n’uwundi.

Abakinyi nabo bafatiwe ibihano basabwe kwegera ababijejwe kugira bahabwe udushirukabute batari bwahabwe tujanye n’imishahara yabo hamwe n’udushirukabute tw’inkino uwo murwi watsinze (primes de match, primes mensuelles). Utwo dushirukabutse bakaba ariko bazoduhabwa babanje gusubiza ibikoresho vy’akazi bisubizwa bahawe.

Mu murwi AIGLE NOIR w’i Makamba bavuga ko abo bakuwe ku rutonde bahagaritswe muri uwo murwi ku mvo z’uko badashaka kwubaha amategeko bahawe y’uko bategerezwa kuba bari i Makamba kw’igenekerezo rya 17 Ndamukiza 2018, mu kibanza c’imyimenyerezo, ivyo mu gifaransa bita "Local".

Abo bakinyi indwi basezerewe muri AIGLE NOIR ni NDAYISHIMIYE Yussuf Nyange, NAHIMANA Moise, NAHIMANA Eloi Fils, NDIKUMANA Jean Etando, RUKUNDO Therence, IRAKOZE Yves hamwe na NDAYISHIMIYE Eric.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha