Igipfungu kiribonekeza mu mafaranga Reta ikoresha

Umuhinga muvy’ubutunzi Karori Nihangaza amenyesha ko amafaranga amwe amwe Reta ikoresha kandi iba itayashize mu nteguro y’ayo izokoresha ari mu bituma haba ubunyonyezi bw’amatungo ya Reta.

Mu cigwa yakoze abitumwe n’ishirahamwe rihamagarira abarundi guhindura ingendo PARCEM (Parole et Action pour le Réveil des Consciences et Changement de mentalités) yasavye ko hoba umuco mu vyerekeye ayo mafaranga atangwa ataba ari muyo Reta yategekanije gukoresha.

Mu gihe yariko ashikiriza ivyavuye muri ico cigwa, mu ruganda yakoze kuri uno wa gatatu, Karori Nihangaza, umuhinga mu vyerekeye ubutunzi yamenyesheje ko inzego zitandukanye za Reta zijejwe kurwanya abarya ibiturire n’abanyonyeza amatunga ya Reta ntizifise ubwigenge bwo gufata ingingo. Izo nzego ububasha bwazo buherera gusa ku kudoma urutoke ku banyonyeje amatunga ya Reta, ariko nta bubasha zifise bwo guhana ababa babikoze.

Karori Nihangaza, umuhinga mu vyerekeye ubutunzi

Kubwa Karori Nihangaza, vyari bikwiye ko amakonte yose ataba ari mw’itegeko rigenga amafaranga Reta izokoresha yogabanurwa, kuko atuma haba ubunyonyezi butagira izina.
Kugira habe igenzurwa rikwiye mu vyerekeye ubutunzi bwa Reta, uwo muhinga amenyesha ko vyari bikwiye ko Uburundi bugira ubuyobozi bukuru bujejwe kugenzura inzego zose za Reta gushika no ku biro vy’umukuru w’igihugu.

Uwo muhinga asaba abo mu mashirahamwe adaharanira ivyicaro vya poritike gukorana n’abashingamateka kugira haboneke umuco ukwiye mu vyerekeye ikoreshwa ry’amatunga ya Reta.