Sino African trading and investment initiatives Co Limited yoba itabaho mu Bushinwa

Ikibazo c’ahahoze hakorera isoko nkuru ya Bujumbura kigiye gushirwa muri rwa rugamba rwo kwiyamiriza ubuzima buzimvye, nk’uko bishikirizwa na Gabriel Rufyiri arongoye ishirahamwe OLUCOME.

Gabriel Rufyiri arongoye OLUCOME

Ivyo Gabriel Rufyiri akaba abishikirije, inyuma yaho inama nshikiranganji yemeje kuri uno wa kane integuro y’itegeko iha ico kibanza ishirahamwe ry’abashinwa ryitwa Sino African trading and investment initiatives co limited kuhakorera mu kiringo c’imyaka 50.

Muri OLUCOME( Observatoire de lutte contre la Corruption et les Malversations Economiques ) bavuga ko baraye baguye mu gahundwe inyuma yaho bumviye ko inama nshikiranganji yemeje itegeko ryegurira ikibanza cahahoze isoko nkuru ya Bujumbura, mu kiringo c’imyaka mirongo itanu ishobora kwiyongera, kuri sosiyeti y’abashinwa’’ Sino African trading and investment initiatives co limited’’.

Gabriel Rufyiri arongoye ishirahamwe OLUCOME ati :’’ Turavye ivyo Reta iriko irakora muri ino minsi iriko ikora nkaho umenga Uburundi butazosubira kubaho’’. Gabriel Rufyiri avuga ko amakuru yose babonye agaragaza neza ko iryo shirahamwe Sino African Trading and Investment Initiatives co limited’’ ritabaho mu gihugu c’Ubushinwa ahubwo ko ryashinzwe mu kwezi kwa Nyakanga mu ntumbero y’ico kibazo nyene.

Muri OLUCOME bibutsa n’ayandi madosiye yagiye agaragaramwo amahinyu ugasanga bavuga ko ari abanyamitahe bazanye imitahe yabo kandi ari amashirahamwe usanga atanabaho. Aha akibutsa idosiye ijanye n’ikivuko ca Bujumbura, ikibanza c’mahegitari 48,5 kigiye guhabwa ishirahamwe ry’abantu batanu biboneka ko rigizwe n’umuryango umwe, mbere rigaragaramwo amahinyu atari make, kw’ibarabara rya Bubanza n’ayandi. Gabriel Rufyiri arongoye ishirahamwe OLUCOME avuga ko bagiye gukomeza urugamba rwo kuvyiyamiriza , mbere avuga ko bagiye kugishira muri rwa rugamba rw’ubuzima buzimvye.

Ku ruhande rw’abadandaza naho, umukuru wa sendika y’abadandaza SYGECO avuga ko bagiye gukora amanama barabe ico bagiye gukora. Basaba umukuru ’igihugu kwumva akamo k’abadandaza kuko bakeneye ko basubizwa agateka kabo. Ikindi bagiye gukora ni gusUbira mu buserukizi bw’igihugu c’Ubushinwa kubaza ko boba baratoye iryo shirahamwe ko ryoba ribaho.

Tubibutse ko kuri uyu wa 26 Ruhuhuma, abarongoye ayo mashirahamwe abiri SYGECO na OLUCOME bari bahawe umubonano mu buserukizi bw’igihugu c’ubushinwa hano mu Burundi, bakaba babamenyeshejwe ko iryo shirahamwe ataryo bazi gushika ino saha.