2014, umwaka wahariwe uburimyi mbumbarugo

Nk’uko bivugwa na Boniface Mwikomo umwunganizi w’umushikiranganji w’uburimyi n’ubworozi, uburimyi mbumbarugo bufitiye akamaro kanini igice kinini c’abarundi.

Boniface Mwikomo akavuga ko uyu mwaka w’2014 wahariwe uburimyi mbumbarugo mw’ishirahamwe mpuzamakungu ONU. Abandanya amenyesha ko abarimyi bategerezwa kwigishwa uko borima mu ntumbero yo kurwiza umwimbu, hakoreshejwe ubuhinga bwa none. Muri ivyo bikorwa vyari vyatumiwemwo abarongoye uburimyi n’ubworozi mu ntara za Bujumbura, Bubanza, Cibitoke na Muramvya, hamwe n’abarimyi bo muri izo ntara, bakaba basabwa gukora mu ntumbero yo guteza imbere uburimyi, na cane cane uburimyi mbumbarugo.

Mukamenya ko mu gihugu c’Uburundi, ibice bigera kuri 90 kw’ijana bitunzwe n’uburimyi n’ubworozi, ariko bikagaragara ko uburimyi bwakoreshwa mu myaka iheze, bwo kurima atamwavu urinze gukoreshwa vyahindutse, isi yatitutse, umwavu nawo abanyagihugu bakavuga ko ubazimba, ibituma umwimbu utera usubira inyuma mu gihugu, inzara nayo, igaca yugariza imiryango itandukanye.