Abakorera mu bibanza vyatewe n’umuriro basaba kwinjira kuraba ivyononekaye

Yanditswe na Egide NDUWIMANA
Kuya 12 juin 2017 saa 01:08
Yasomwe : 9000
0 0

Abadandaza bahora bakorera mu mazu y’ubudandaji ari hafi y’aho bita "Le Parisien" yahiye ku munsi wa gatandatu, mu gisagara ca Bujumbura, basaba ko bohabwa uruhusha rw’ukwinjira kuraba ivyo batakarije mu mpanuka y’umuriro yateye ico kibanza.

Abo badandaza bazindukiye muri ico kibanza, bakavuga ko bari baje kwegeranya ibintu vyasanzaye, barabe ivyahiye hamwe n’ivyoba vyaribwe.

Abo badandaza babwiwe ko inyuma y’umuhingamo wo kuri uwu wa mbere bashobora kwemererwa kwinjira aho bahora bakorera, nihahera ibikorwa vy’ukwegeranya ibisigarira vy’ivyahiye.

Abajejwe gutunganya ico kibanza c’ubudandaji cahiye bamenyesheje abo badandaza ko borindira, bakabizeza ko inyuma y’umutaga, ibikorwa vy’ugusibura ahononekaye nivyahera, abo badandaza bashobora kwinjira kuraba ibintu vyabo.

Ibibanza vy’ubudandaji biri ahitwa kwa NDAYIZAMBA, hagati y’ihinguriro REGIDESO n’isoko "Le Parisien" vyatewe kuri uwu wa gatandatu n’impanuka y’umuriro uvuye ntsinga za REGIDESO zitari zashizweho neza.

Mu giporisi kijejwe gukinga impanuka barihutiye kuza kuzimya, ivyatumye uwo muriro utamara umwanya munini, kandi udatandukira ibindi bibanza vy’ubudandaji vyegereye aho hahiye.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha