Abanyeshure bo muri Kaminuza za EAC bakoraniye i Bujumbura

Levis Dotto NIYONKURU arongoye CHAWAKAMA mu karere ka Afirika y’Ubuseruko amenyesha ko ikoraniro bateguye i Bujumbura rizotuma urwaruka rwo mu Burundi rushobora gutsimbataza imigenderanire n’urundi rwaruka rwo mu karere ka Afirika y’Ubuseruko biciye mu rurimi rw’igiswahili, ndetse bongere bamenye n’uko urundi rwaruka rwiteza imbere hamwe no guhanahana ubumenyi ku bijanye n’imibano.

Umukuru wa CHAWAKAMA Levis Dotto NIYONKURU yamenyesheje ko ibikorwa bitegekanijwe muri iryo koraniro ko harimwo inyigisho zizotangwa biciye mu rurimi rw’Igiswahili, guhanahana ubumenyi hagati y’urwaruka rwo mu karere ka Afirika y’Ubuseruko, kwigira hamwe ibijanye n’imibano y’ibihugu vyabo, inkino hamwe n’utugenegene.

Levis Dotto NIYONKURU arongoye CHAWAKAMA mu karere ka Afirika y’Ubuseruko

Ku rwaruka rwo mu Burundi, Levis Dotto NIYONKURU avuga iryo koraniro rizofasha urwaruka kumenya no kwumviriza uko bavuga neza ururimi rw’Igiswahili kugira rubimenye, kuko ku bwiwe Igiswahili gisanzwe arirwo rurimi ruri imbere muri uwo muryango w’akarere ka Afirika y’Ubuseruko.

Mwomenya ko iyo nama y’ishirahamwe ry’abanyeshure bo muri Kaminuza zo mu karere ka Afirika y’Ubuseruko igira ya 13 yama iba uko umwaka utashe, akaba ari irya mbere ibereye mu Burundi ku civugo kivuga giti : « Itwararike Igiswahiri ushire mu ngiro indoto zawe ».

Iyo nama yatanguye kuri uwu wa gatatu izorangira kuri uwu wa gatanu.