Abashora ikawa hanze basabwa gushinga ibiciro ku makawa yaronse abaguzi

Yanditswe na Vianney BIKORIMANA
Kuya 6 Munyonyo 2017 saa 02:31
6165
0 0

Igisata ca Reta kijejwe gukwirikirana igiterwa c’ikawa mu Burundi (ARFIC : Autorité de Régulation de la Filière Café du Burundi) kimenyesha ko abashora ikawa hanze batorindira ko ibiciro mpuzamakungu biduga, ariko bihutire gushinga ibiciro vyihuta ku makawa yose amaze kuronka abaguzi.

Muri ARFIC basigura ko ivyo vyashinzwe mu ntumbero yo kwirinda ikoroka ry’ibiciro vy’ikawa ryibonekeza kw’isoko mpuzamakungu, bitumwe n’umwimbu uguma wiyongera muri Amerika y’epfo, na cane cane mu gihugu ca Bresil.

Mu nama yo guhunahana ivyiyumviro yahuje abayobozi bo muri ARFIC hamwe n’abashorera ikawa hanze y’igihugu yabaye kw’igenekerezo rya 3 Munyonyo 2017, bumvikanye ko abashorera ikawa hanze bategerezwa kurondera abaguzi benshi batandukanye kugira ikawa y’Uburundi ntigume igurwa n’abahora bayigura gusa.

Ibanki nkuru y’igihugu yasabwe ko yokwama itomora uko amafaranga y’agaciro agenda araca ku makonte y’abashora ikawa hanze.

Ku bijanye n’ikawa itararonka abaguzi, muri iyo nama bumvikanye ko amakawa azohora adandazwa icamunara buri misi yose ya gatatu kuva igenekerezo rya 6 Munyonyo uwu mwaka.

Amatoni angana ibihumbi 16 niyo amaze kwegeranwa gushika muri Munyonyo 2017. Muri ayo, amatoni ibihumbi 6048 niyo amaze gushoka hanze y’igihugu.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha