Abatembereza ingenzi mu bibanza vy’iratiro bagiye guhabwa inyigisho

Yanditswe na MUGISHA Van Naris
Kuya 12 décembre 2017 saa 09:55
Yasomwe :
0 0

Umuyobozi mukuru ajejwe igisata c’ingenzi mu bushikiranganji bw’ubudandaji amenyesha ko kugira igisata c’ingenzi n’amahoteri gitere imbere, abagikoreramwo bategerezwa kuronswa inyigisho, harimwo n’ururimi rw’icongereza kugira bashobore kwakira neza ingenzi bazisigurire kandi mu ndimi bumva.

Leonidas HABONIMANA avuga ko abakozi mu gisata c’ingenzi bariho, ariko nk’abajejwe gutembereza ingenzi naho bariho, benshi ata bumenyi babifisemwo kuko bataronse inyigisho z’ingene bikorwa.

Umuyobozi mukuru ajejwe igisata c’ingezi mu bushikiranganji bw’ubudandaji avuga ko bikenewe ko abakira ingenzi bokwitegura neza, kugira bashobore kwakira neza ingenzi zigendera ibibanza vy’iratiro.

Naho izo ngenzi zoba zaje, Leonidas HABONIMANA avuga ko hakiri ikitagenda neza kuko ibibanza vy’iratiro biriho mu gihugu cose, ariko abatembereza ingenzi babifisemwo ubumenyi akaba atabariho.

Leonidas HABONIMANA avuga ko mu ntumbero yo gutorera inyishu ivyo bibazo vyose, hari umugambi wo kwigisha abajejwe gutembereza ingenzi mu bibanza vy’iratiro bashika 250, mu kiringo c’amezi atatu kuva mu kwezi kwa mbere 2018, kugira n’imiburiburi ikomine yose mu gihugu izobe ifise uwutembereza ingenzi.

Mwomenya ko mu Burundi bwose hari ibibanza vy’iratiro 126.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha