Abatumiwe n’umuhuza basavye ko ibikorwa vya CVR vyoba birahagaze

Mw’itangazo amashirahamwe 18 yasohoye, abayaserukira basavye umuhuza w’Abarundi ko igikorwa c’uguhinyanyura ibwirizwa shingiro ry’Uburundi cohagarara, n’amategeko yose atubahiriza agateka ka zina muntu ntaterweko umukono.

Mu ntumbero y’ukugarukana amahoro mu Burundi, ayo mashirahamwe yasavye umuhuza ko yoshira mu ngiro ivyasabwe n’inama mpuzamakungu ONU, mu Burundi harungikwe inteko mvamakungu (MAPROBU).

Ayo mashirahamwe asaba kandi ko ibikorwa vy’umurwi CVR ujejwe kumenyesha ukuri
ku vyabaye mu Burundi hamwe n’ukunywanisha Abarundi, vyoba birahagara, bikazosubira kubandanya Uburundi bumaze gutekana.

Mu biganiro bihuza Abarundi bigiye kubandanya, ayo mashirahamwe yasavye ko impande zose zokwumvikana ku botumirwa, hisunzwe ikibazo ca poritike kiri mu Burundi.

Abapfunzwe bagirizwa poritike nabo basabiwe kurekurwa, ubutungane nabwo bushengeze abaturiye insamirizi zigenga, izo nsamirizi zasambuwe nazo zisanurwe kugira zisubire gukora.