Abitavye inama ya EAPCE’2017 bibukijwe ko iterambere rishoboka hari amahoro

Yanditswe na Egide NDUWIMANA
Kuya 7 Ruheshi 2017 saa 12:50
Yasomwe : 10233
0 0

Ibihugu vyitavye inama igira umunani mu bijanye n’igisata c’ibitoro na peterori ihuza ibihugu vya Afrika y’ubuseruko yatanguye mu gisagara ca Bujumbura kuva kuri uwu wa gatatu igenekerezo rya 7 Ruheshi gushika kuwa 9 Ruheshi 2017 basabwe gukora ibishoboka vyose kugira biteze imbere igisata c’igitoro, ivyo vyose bigashoboka ibihugu vyose bikomeje amahoro, kuko iterambere ridashoboka amahoro adahari, nk’uko vyashikirijwe n’umukuru w’igihugu Petero NKURUNZIZA.

Mw’ijambo yashikirije yugurura ibikorwa vy’iyo nama, umukuru w’igihugu Petero NKURUNZIZA yasavye ibihugu vy’Abakoroni ko vyokwubahiriza ubwigenge bw’ibihugu vya Afrika, ugukorana n’ivyo bihugu kubandanye ariko hari ukwubahana.

JPEG - 44.1 ko
Umukuru w’igihugu Peter NKURUNZIZA

Umushikiranganji w’amasoko ntanganguvu, Come MANIRAKIZA, yamenyesheje ko iyo nama yatanguye i Bujumbura kuva kuri uwu wa gatatu ari inama yama iba uko imyaka ibiri iheze, Uburundi bukaba buyakiriye ku ncuro ya mbere.

Yagize ati : Ni akaryo kugira bino bihugu vyacu vyo mu karere ka Afrika y’uburuko hamwe n’abakorera mu gisata c’igitoro, ko kurabira hamwe intambwe tugezeko mu guteza imbere ico gisata kijanye n’ukwimba Peterori hamwe na gaze. Iyi minsi itatu izoba akanya ko kwicarana n’abahinga batandukanye, ivyigwa bitandukanye bikazoshikirizwa kugira tugende turaraba aho tugejeje ivyerekeye guteza imbere igisata c’iterambere ry’ibihugu vyacu dufashijwe n’ukwimba, hamwe n’ugucuruza Peterori na gaze.

JPEG - 187.6 ko
Come MANIRAKIZA, umushikiranganji w’amasoko ntanganguvu

Iyo nama ku bijanye n’ibitoro ibaye mu gihe Uburundi bumaze iminsi mu bukene bw’igitoro co mu bwoko bwa "Essence" na "Mazout". Umushikiranganji Come MANIRAKIZA ajejwe amasoko ntanganguvu amenyesha ko abarondera igitoro bohumura, kuko igitoro kiriko kirinjira ku bwinshi mu Burundi, akemeza ko ubushikiranganji arongoye buriko burakurikira igitera ubukene bw’igitoro, akizeza ko umuti ku bukene bw’igitoro ugiye kuboneka.

Inama igira umunani mu bijanye n’igisata c’ibitoro na peterori ihuza ibihugu vya Afrika y’ubuseruko, ikazomara iminsi itatu, gushika kuri uwu wa gatanu igenekerezo rya 9 Ruheshi 2017.

Mu bihugu bitandatu bigize umuryang wa Afrika y’ubuseruko vyari kwitaba iyo nama, hitavye bitanu gusa, Urwanda rukaba rutaserukiwe.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha