Guteza imbere intwaro n’inzego vyarasubiye inyuma mu Burundi

Yanditswe na BIKORIMANA Vianney
Kuya 1er Myandagaro 2017 saa 09:10
Yasomwe : 5940
0 0

Icegeranyo gishasha c’ibanki y’isi cerekana ko igihugu c’Uburundi kiza mu bihugu vya nyuma mu karere ko muri Afrika gaherereye musi ya Sahara, mu bijanye n’intwaro hamwe n’inzego.

Nk’uko biri mu cegeranyo c’ibanki y’isi, Ibihugu vy’Urwanda, Senegal hamwe n’igihugu ca Kenya nivyo biza ubwa mbere mu bijanye n’intwaro mu karere ka Afrika ko musi ya Sahara, ariko ico cegeranyo cerekana ko iterambere mu vy’intwaro hamwe n’inzego bikiri ku rugero rwo hasi cane muri ivyo bihugu.

Icegeranyo gishasha c’ibanki y’isi cerekana ko igihugu c’Urwanda arico kiza kw’isonga mu vy’intwaro muri Afrika kikaba gifise amanota 4 ku manota 6 aho kikaza kw’isonga ry’ibihugu 7 arivyo Cote d’Ivoire, Ethiopie, Kenya, Mali, Sénégal na Tanzaniya vyo muri Afirika biharurwa ko bigerageza kunagura no guteza imbere ivy’intwaro n’inzego z’igihugu.

Icegeranyo giheruka co mu mwaka wa 2016 cerekana ko akanovera muvya poritike n’inzego vyagiye bitosekara gushika ku bice 40 kw’ijana muri Afrika ugereranije n’umwaka wa 2015, aho ico cegeranyo kivuga ko naho ibihugu vy’Urwanda, Senegal na Kenya bifise ibiharuro vyiza gusumba ibindi bihugu, biboneka ko urugero rukiri hasi mw’iterambere ryibijanye n’intwaro hamwe n’inzego.

Musi y’urwo rutonde rw’ibanki y’isi haza ibihugu vya Tchad, Sudani y’epfo, Erythree, Centrafrika, Guinee Bissau n’igihugu ca Zimbabwe kiza ubwa nyuma aho catakaje n’ibice 0,2 cari gifise mu mwaka wa 2015.

Uburundi buza mu bihugu amanota yavyo yamanutse ku rugero runini co kimwe n’ibihugu nka Benin, Sierra Leone na Nigeria.

Mwomenya ko ico cegeranyo c’ibanki y’isi citirirwa umwihwezo ku bijanye n’intwaro hamwe n’inzego mu bihugu vyo muri Afirika (CPIA : Evaluation des politiques et des institutions nationales en Afrique) kikaba gisohoka buri mwaka kuva mu mwaka wa 2006.

Ico cegeranyo nyene nico cegerenyo gifatirwako mu kumenya igihugu gikwiye kuronswa intererano n’ishirahamwe mpuzamakungu rijejwe iterambere (IDA : l’Association internationale pour le développement) risanzwe ari igisata c’ibanki y’isi kijejwe kugwanya ubukene kw’isi.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha