Ibikorwa bitegura ihayanisha JUA KALI/ NGUVU KAZI vyatangujwe

Yanditswe na Vianney BIKORIMANA
Kuya 20 Munyonyo 2017 saa 03:05
Yasomwe : 3132
0 0

Ubushikiranganji bw’ubudandaji, amahinguriro hamwe n’ingenzi bwatanguje ku mugaragaro ibikorwa bitegura ihayanisha-gurisha ryitiriwe “JUA KALI/NGUVU KAZI” rihuza abahinga bo mu bihugu vyo mu karere ka Afrika y’Ubuseruko vyama biba mu mpera za buri mwaka mu ntumbero yo guhuza abahinga n’abanyamyuga bo muri ako karere.

Mw’ijambo ryiwe ryo gutanguza ivyo bikorwa, umushikiranganji w’ubudandaji, amahinguriro hamwe n’ingenzi, Pelate NIYONKURU yamenyesheje ko iryo hayanisha rituma abanyamyuga, n’abashinze amashirahamwe mato mato n’ayisununuye yo muri ako karere ashobora guhurira hamwe kugira yungurane ubumenyi ku bijanye n’ubuhinga.

Pelate NIYONKURU yashikirije kandi ko iryo hayanisha-gurisha rifasha abo banyamyuga kubugururira imbibe kugira baje kurondera amasoko y’ivyo bahinguye, bigatuma batera imbere muvyo bakora.

Uwo mushikiranganji yashikirije kandi ko iryo huriro rifasha ibihugu vyo muri ako karere bironkeraho akaryo ko kwiyumvira no gukoresha ubuhinga bushasha butuma umwimbu urwira, ndetse ukarushirizaho kuba mwiza kugira uhiganwe n’uwo mu bindi bihugu bigize ako karere.

Nk’uko uwo mushikiranganji yabandanije abivuga, iryo hayanisha rirafasha kugira amasoko yuguruke, akazi kakiyongera, amafaranga y’agaciro akinjira mu gihugu bigafasha urudandazwa njabukamazi gukomera.

Iryo hayanisha-gurisha ry’akarere ka Afirika y’Ubuseruko ryitiriwe "JUA KALI /NGUVU KAZI" ryatanguye mu mwaka w’i 1999 i Arusha mu gihugu ca Tanzaniya, rikazoba rigize ihayanisha rya kabiri ry’urwo rwego Uburundi bwakiriye, inyuma y’iryo bwakiriye mu mwaka wa 2012. Uwu mwaka rikazotangura kw’igenekerezo rya 4 gushika kw’igenekerezo rya 10 Kigarama 2017.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha