Icegeranyo ca SOS-TORTURE kivuga abantu batatu bishwe

Abantu batatu nibo bagandaguwe mu kiringo c’indwi yo kuva kuwa 8 gushika kuwa 16 Ndamukiza 2017, nk’uko biri mu cegeranyo c’ishirahamwe SOS -TORTURE Burundi. Ico cegeranyo kiragaruka ku rupfu rwa Evelyne Nizigiyimana, umukozi wa COOPEC Ngozi yagandaguwe n’umunywanyi w’iryo shirahamwe ry’ukuziganya n’ukuguranana.

Muri SOS-TORTURE Burundi bavuga kandi abantu batanu bahagaritswe muri ico kiringo, hamwe n’abaserukira abandi mu banyeshure ba Kaminuza y’Uburundi batawe muri yompi, bakaba ubu bapfungiwe mw’ibohero rikuru rya Mpimba.

Icegeranyo ca SOS-TORTURE Burundi kinegura ko urwego rw’igendereza ruriko rurivanga mu kibazo kijanye n’ivy’indero, mu guhagarika abanyeshure baserukira abandi muri Kaminuza y’Uburundi, baheruka kwandikira umukuru w’igihugu bamusaba ko yohagarika itegeko risubiramwo ingene bazohora bahabwa agafashanyo, kagiye guhinduka ingurane (Prêt-bourse).